O crimen d'as tres fes

Iste ye o zaguer libro libret que me leyé en aragonés. Seguntes mete en o prelogo ye a unica nobela puliziaca que escribió Ramon J. Sender. Clamar-li nobela ye demasiato ta bentiseis pachinas que se leyen en una ora, manimenos, reyalmén ye una narrazión curta.

O libret ye a istoria de un mesache que bibe en Los Angeles, Juan Pérez, comenzipa con a suya muerte e dimpues cuenta os suyos zaguers diyas. O suyo quefer yera un poquet rarizo, cuan beyeba en o diario que se'n eba suizidato bella presona, er clamaba a ra pulizia e deziba que er li eba amortado ta adrezar a ziudá. Dimpués de que le agafó a polizia e o chuez le declaró inozén, se'n fue ta Las Vegas ta chugar en os casinos. Alí conoxió a una actriz, Marilyn, a ra que le cuacaban os mesaches d'as tres fes: fortals, fieros e formals. Y como solo en eba un ombre dixas carauteristicas en o casino, Juan prencipó a tramiar o suyo crimen.

A berdá ye que iste ye o primer tecsto que leigo de Sender, que bergueña a de yo, pero no me ye cuacato muito. Tres cuartals partis d'o libro son a presentazión d'o personache e luego lo remata corriendo. Ista edizión d'o libro ye buena ta la chen que ye prenzipando con o aragonés, puesto que ye bilingüe chunto con o castellano e ye facil de leyer.

A bier si istos siñors de Gara d'edizions continan triballando con as suyas traduzions de libros, que belún no ye leyito O Hobbit porque yera en paranza en a suya web fa zinco añadas e güei o proyeuto contina igual de aturato.